ຂປລ. ນະຄອນຫລວງວຽງຈັນ ຮ່ວມກັບພາກເອກກະຊົນຈະເລີ່ມລົງມືຮື້ຖອນ ແລະ ປັບປຸງສາຍໄຟຟ້າ, ສາຍໂທລະສັບ, ສາຍໂທລະພາບເຄເບີ້ນ ທີ່ຫຍຸ້ງກ້ຽວພັນເສົາໄຟຟ້າ ແລະ ຕົ້ນໄມ້ຕາມເສັ້ນທາງຕ່າງໆ ໃນນະ ຄອນຫລວງວຽງຈັນ ໃຫ້ເຂົ້າສູ່ລະບົບພາຍໃນເດືອນນີ້. ພາຍຫລັງກອງປະຊຸມປຶກສາຫາລື ແລະ ແລກປ່ຽນຄວາມຄິດເຫັນ ໄດ້ມີມະຕິຕົກລົງຈັດຕັ້ງປະຕິບັດຢ່າງເປັນທາງການ ໃນວັນທີ 19 ພຶດສະພາ 2015 ນີ້ ຢູ່ນະຄອນຫລວງວຽງຈັນ.
ກອງປະຊຸມໄດ້ເຊີນຄະນະຊີ້ນໍານະຄອນຫລວງວຽງຈັນ, ບັນດາຫົວໜ່ວຍທຸລະກິດຂອງ ໂທລະຄົມມະນາຄົມ, ໂທລະພາບເຄເບີ້ນ ແລະ ອົງການຈັດຕັ້ງທີ່ກ່ຽວຂ້ອງ ຮ່ວມກັນສົນທະນາ ແລະ ແລກປ່ຽນບົດຮຽນເພື່ອຫາທາງອອກໃນການແກ້ໄຂບັນຫາທີ່ເກີດຂຶ້ນ ພ້ອມນີ້ກໍຕ້ອງຮັບຮູ້ ແລະ ເຂົ້າໃຈເປັນເອກະພາບໃນການລົງມືຈັດຕັ້ງປະຕິບັດຢ່າງເປັນຮູບປະທໍາ.
ທ່ານ ຄູທອງ ທ່ຽງມະນີ ຫົວໜ້າຂະແໜງບໍລິຫານພະລັງງານ ແລະ ສົ່ງເສີມພະລັງງານທົດແທນ ໄດ້ໃຫ້ສໍາພາດຕໍ່ນັກຂ່າວ ສຳນັກຂ່າວສານປະເທດລາວ ວ່າ: ເພື່ອປະຕິບັດ 6 ສ, ກຽມໃສ່ 2 ວັນປະຫວັດສາດ, ເປັນປະທານອາຊຽນ ແລະ ເປັນເຈົ້າພາບກອງປະຊຸມສຸດຍອດອາຊຽນ ພາຍໃນປີ 2015 ຢູ່ ສປປ ລາວ ນັ້ນພວກເຮົາມີຄວາມຈໍາເປັນຕ້ອງໄດ້ປັບປຸງ ແລະ ແກ້ໄຂສິ່ງບໍ່ຈົບບໍ່ງາມ ແລະ ຄວາມບໍ່ເປັນລະບຽບຮຽບຮ້ອຍ ໂດຍສະເພາະ ບັນຫາສາຍໄຟຟ້າ, ສາຍໂທລະສັບ ແລະ ໂທລະພາບເຄເບີ້ນ ທີ່ປະກົດເຫັນຕາມຈຸດຕ່າງໆໃນສະພາບຫຍຸ້ງກ້ຽວພັນ ແລະ ຂ້າມທາງຢັ່ງຢ່າຍຊະຊາຍ ເຊິ່ງກໍໃຫ້ເກີດມີຄວາມສ່ຽງຕໍ່ການເກີດອັກຄີໄຟ ແລະ ສ້າງພາບຟົດບໍ່ຈົບບໍ່ງາມ ໃຫ້ແຂກທັງພາຍໃນ ແລະ ຕ່າງປະເທດ.
ສະນັ້ນ ພວກເຮົາໄດ້ຕົກລົງເຫັນດີເປັນເອກະພາບວ່າ: ສາຍໄຟຟ້າຂ້າມທາງຢູ່ຕາມຈຸດຕ່າງໆນັ້ນຕ້ອງໄດ້ມັດໂຮມເຂົ້າຈຸດດຽວກັນ ແລະ ບໍ່ອະນຸຍາດໃຫ້ບໍລິສັດ ຫລື ນິຕິບຸກໃດໜຶ່ງ ຕັດສິນໃຈເອົາສາຍໄຟຟ້າຂ້າມທາງຕາມລໍາຟັງໃຈ ເພື່ອຮັບປະກັນເຮັດໃຫ້ສະພາບດັ່ງກ່າວໝົດໄປ.
0 comments:
Post a Comment