ໜຸ່ມນັກຕົບທີມຊາດລາວ ຄວ້າພຽງອັນດັບທີ4 ປິດສາກການແຂ່ງຂັນກິລາ ບານສົ່ງຫາດຊາຍ ຊີງແຊ໋ມ ອາຊຽນ ຄັ້ງທີ 28 ຫຼືSouth East Asian Beach Volleyball Champion Ships 2015. ຂະນະທີ່ ທັບນັກຕົບທີມຊາດໄທກວາດແຊ໋ມທັງຍິງ ແລະ ຊາຍ ພ້ອມເງິນລາງວັນ 3.000 ໂດລາສະຫະລັດອາເມຣິກາ ຫຼື ປະມານເກືອບ30 ລ້ານກີບໄປຄອງ
ເມື່ອຕອນແລງວັນທີ12 ກໍລະກົດ ຜ່ານມາ ທີ່ລານສະຫຼອງໄຊ ສວນເຈົ້າອານຸວົງ ເມືອງຈັນທະບູລີ ນະຄອນຫຼວງວຽງຈັນສປປ ລາວ ໄດ້ມີພິທີປິດການແຂ່ງຂັນກິລາບານສົ່ງຫາດຊາຍ ຊີງແຊ໋ມ ອາຊຽນ ຄັ້ງທີ 28 ຫຼັງຈາກໄດ້ດຳເນີນການແຂ່ງຂັນມາແຕ່ວັນທີ 12 ກໍລະກົດ 2015 ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງທ່ານ ສາຍທອງ ແກ້ວດວງດີຮອງເຈົ້າຄອງ ນະຄອນຫຼວງວຽງຈັນ, ທ່ານ ສົມພູ ພົງສາ ຜູ້ຊ່ວຍລັດຖະມົນຕີ ກະຊວງສຶກສາທິການແລະ ກິລາ (ສສກ) ທັງເປັນຮອງປະທານ ແລະ ເລຂາທິການຄະນະກຳມະການໂອແລມປິກແຫ່ງຊາດລາວແລະ ທ່ານ ຄຳສອນ ແພງຣັດຕະນະວົງ ຜູ້ອຳນວຍການຝ່າຍການຄ້າ ບໍລິສັດ ເບຍລາວ ຈຳກັດແລະ ທ່ານ ຈັນສະໝອນ ຜ່ອງຈັນທາ ຮັກສາການປະທານສະຫະພັນບານສົ່ງແຫ່ງຊາດລາວ, ມີທ່ານແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງ ສສກ ແລະ ທ່ານ ນາງ ພູນສະຫວັດອຸນນາລົງ ຜູ້ຈັດການປະສານງານພາກລັດຖະບານ ບໍລິສັດ ເບຍລາວ ຈຳກັດ ພ້ອມດ້ວຍ ພໍ່-ແມ່ປະຊາຊົນຊາວລາວແລະ ນັກທ່ອງທ່ຽວຊາວຕ່າງປະເທດເຂົ້າຮ່ວມຫຼາຍພັນຄົນ.
ໃນພິທີດັ່ງກ່າວກໍ່ໄດ້ມີການແຂ່ງຂັນຄູ່ຊີງຊະນະເລີດ ແລະ ຊີງອັນດັບທີ 3 ສຳລັບຄູ່ຊີງອັນດັບທີ3 ເປັນການພົບກັນລະຫວ່າງ ທີມໜຸ່ມລາວ1 ປະກອບມີ ທ້າວ ຈິດສະໝອນ ສຸດທິປັນຍາ+ທ້າວທຳມາສິນ ພົງສະຫວັດ ພົບກັບ ທີມໄທ2 ຄື: ທ້າວ ເສດທາວັດ ພັດສາວຸດ+ທ້າວ ນັດທະນົນອິນກິວ ຜົນປາກົດວ່າ ຄູ່ນັກຕົບໜຸ່ມລາວ ສູ້ບໍ່ໄຫວຖືກ ທີມໄທ ໄລ່ເອົາຊະນະໄປແບບຂາດຮອຍ0-2 ເຊັດ ດ້ວຍຄະແນນ 21-18 ແລະ 21-8 ຄະແນນ ໄດ້ພຽງອັນດັບທີ 4 ພ້ອມທັງໄດ້ຮັບເງິນລາງວັນ500 ໂດລາສະຫະລັດ ຂະນະທີ່ທີມໄທ ກໍ່ໄດ້ຮັບເງິນລາງວັນ 700 ໂດລາສະຫະລັດໄປຄອງ.
ສ່ວນຄູ່ຊີງຊະນະເລີດສຳລັບປະເພດທີມຄູ່ຍິງ ເປັນການພົບກັນລະຫວ່າງ ທີມໄທ1 ປະກອບມີ ນາງ ອາລິຍາລາວແສງສາ+ນາງ ກິຈາ ຄັນຕາລັກ ພົບກັບ ທີມອິນໂດເນເຊຍ ຄື: ນາງ ອາຢູ ຄາຢານິງຊິມ+ນາງມາເຣຍ ໄດນິງຢັສ ສ່ວນປະເພດທີມຊາຍ ທີມໄທ1 ຄື: ທ້າວ ປາທີບ ສັກໂຕ+ທ້າວ ກິດຕິພັດຍັງຖິ່ນ ພົບກັບ ທີມອິນໂດເນເຊຍ ທ້າວ ເຣນດີ ເວີດຽນລີຄາໂດ+ທ້າວ ອາດີ ແຄນດາລັດມາວັນ ຜ່າການແຂ່ງຂັນຜົນປາກົດວ່າ ຄູ່ທີມຍິງ ສາວໄທ ອາໃສປະສົບການຂຶ້ນຕົບບານຢ່າງໜັກໜ່ວງໄລ່ເກັບຄະແນນເອົາຊະນະໄປແບບຂາດຮອຍ 2-0 ເຊັດ ດ້ວຍຄະແນນ 21-19 ແລະ 21-18ຄະແນນ ໄດ້ແຊ໋ມໄປຄອງ ພ້ອມເງິນລາງວັນ 1.500 ໂດລາສະຫະລັດ. ຂະນະທີ່ ປະເພດທີມຊາຍໄທ ກໍ່ໂຊຟອມເກັ່ງໄດ້ຄືກັນ ໄລ່ເອົາຊະນະ ອິນໂອເນເຊຍ ໄປແບບຂາດຮອຍ2-0 ເຊັດ ດ້ວຍຄະແນນ 24-22 ແລະ 21-16 ຄະແນນ ໄດ້ແຊ໋ມ ແລະ ເງິນລາງວັນ1.500 ໂດລາສະຫະລັດ ໄປຄອງເຊັ່ນກັນ.
ລາຍການດັ່ງກ່າວໄດ້ດຳເນີນເປັນເວລາ 3 ວັນ ລະຫວ່າງວັນທີ 10-12 ກໍລະກົດ 2015 ໂດຍມີຈຸດປະສົງຫຼັກກໍ່ເພື່ອເປັນການສົ່ງເສີມນັກກິລາບານສົ່ງຫາດຊາຍລາວ ໄດ້ມີການພັດທະນາຄວາມສາມາດຢ່າງຕໍ່ເນື່ອງເພື່ອກ້າວທັນກັບນັກກິລາໃນອາຊຽນດ້ວຍກັນ ພ້ອມທັງເປັນການທົດສອບນັກກິລາຊຸດກຽມຮ່ວມງານມະຫາວິທະຍາໄລອາຊຽນຄັ້ງທີ 18 ທີ່ປະເທດສິງກະໂປ ຮັບກຽດເປັນເຈົ້າພາບ ໃນປີ 2016. ຄຽງຄູ່ກັນນັ້ນ,ກໍ່ຍັງເປັນການສົ່ງເສີມການທ່ອງທ່ຽວໃນສປປ ລາວ ໃຫ້ແຂກຕ່າງດ້າວທ້າວຕ່າງແດນໃນທົ່ວໂລກໄດ້ຮູ້ຈັກປະເທດລາວຫຼາຍຂຶ້ນ ສຳລັບການແຂ່ງຂັນຄັ້ງນີ້ ແມ່ນມີ 5 ປະເທດ ເຂົ້າຮ່ວມ ປະກອບມີ ລາວເຈົ້າພາບ ມີທັງໝົດ 4 ທີມ ຄື, ຍິງ 2 ທີມ ແລະ ຊາຍ 2 ທີມ, ສ່ວນໄທມີ 4 ທີມ ຍິງ2 ທີມ ແລະ ຊາຍ 2 ທີມ, ມາເລເຊຍ 2 ທີມ, ອິນໂດເນເຊຍ 2 ທີມ ແລະ ກຳປູເຈຍ 2 ທີມ ໂດຍລວມທີມຊາຍມີທັງໝົດ 7 ທີມ ແລະ ທີມຍິງມີ6 ທີມ ໂດຍສອງປະເພດດັ່ງກ່າວ ແບ່ງອອກເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເອົາທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ.
0 comments:
Post a Comment