ຂປລ. ລັດຖະບານອິນເດຍ ປະກາດວ່າ ໄດ້ສະໜອງທຶນການສຶກສາປະມານ 150-200 ທຶນຕໍ່ປີໃຫ້ແກ່ ສປປ ລາວ ເຂົ້າໃນໂຄງພັດທະນາຊັບພະຍາກອນມະນຸດ ເພື່ອຮອງຮັບການເຂົ້າເປັນປະຊາຄົມເສດຖະກິດອາຊຽນ ແລະ ການເຊື່ອມໂຍງກັບສາກົນ, ໂດຍກວມເອົາຫລາຍຂະແໜງການເປັນຕົ້ນ ການຝຶກອົບຮົມດ້ານວິຊາການ ໄລຍະສັ້ນ-ຍາວ, ການສຶກສາລະດັບປະລິນຍາຕີ, ປະລິນຍາໂທ. ຂະນະທີ່ສາຍພົວພັນ ແລະ ການຮ່ວມມື ລະຫວ່າງສອງປະເທດ ລາວ-ອິນເດຍ ແມ່ນມີຄວາມໃກ້ ຊິດ ແລະ ແຕກດອກອອກຜົນ, ພົ້ນເດັ່ນນັບແຕ່ສ້າງສາຍພົວພັນການທູດຮ່ວມກັນໃນປີ 1956.
ທ່ານ ຣາວີ ຊັງກາ ໄອໂຊລາ (Mr. Ravi Shankar Aisola), ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ ອິນເດຍປະຈໍາ ສປປ ລາວ ໄດ້ໃຫ້ສໍາພາດຕໍ່ນັກຂ່າວ ສໍານັກຂ່າວສານປະເທດລາວໃນວັນທີ 10 ທັນວາ 2015 ທີ່ ນະຄອນຫລວງວຽງຈັນ ວ່າ: ຕະຫລອດ 59 ປີຜ່ານມານັບແຕ່ພວກເຮົາໄດ້ມີການສ້າງຕັ້ງສາຍພົວພັນທາງການທູດໃນປີ 1956 ນັ້ນເຫັນວ່າການພົວພັນຮ່ວມມື, ການຊ່ວຍເຫລືອເຊິ່ງກັນ ແລະ ກັນ ມີການເຕີບໃຫຍ່ຂະຫຍາຍຕົວ ພົ້ນເດັ່ນໂດຍສະເພາະໄດ້ມີການແລກປ່ຽນການຢ້ຽມຢາມ ແລະ ປຶກສາຫາລືບັນຫາສໍາຄັນຕ່າງໆຮ່ວມກັນ ລະຫວ່າງການນໍາຂັ້ນສູງສອງປະເທດ, ໄດ້ປະກອບສ່ວນຊ່ວຍສ້າງບຸກຄະລາກອນໃນຂະແໜງການຕ່າງໆຂອງລາວ ໂດຍສະເລັ່ຍຮອດປັດຈຸບັນ ມີປະມານ 150-200 ທຶນຕໍ່ປີ, ໄດ້ຊ່ວຍເຫລືອທຶນຮອນເຂົ້າໃນຂະແໜງກະສິກໍາ ທີ່ລວມເອົາທັງທຶນຊ່ວຍເຫລືອລ້າ, ກູ້ຢືມ ແລະ ແລກປ່ຽນວັດທະນະທໍາ. ນອກຈາກນັ້ນ, ຍັງໄດ້ຮ່ວມມືກັນໃນດ້ານການລົງທຶນ, ການທ່ອງທ່ຽວ, ການຄ້າ ແລະ ອື່ນໆ.
ທ່ານ ຣາວີ ຊັງກາ ໄອໂຊລາ ກ່າວຕື່ມວ່າ: ເຖິງແມ່ນການຮ່ວມມືໃນຫລາຍດ້ານພົ້ນເດັ່ນ, ແຕ່ວ່າການຮ່ວມມືດ້ານການຄ້າ ລະຫວ່າງສອງປະເທດພວກເຮົາຍັງບໍ່ເຂັ້ມແຂງເທົ່າທີ່ຄວນ, ສະນັ້ນ, ໃນຕໍ່ໜ້າພວມເຮົາຈະຕ້ອງສືບຕໍ່ພັດທະນາໃຫ້ມີຄວາມເຂັ້ມແຂງ ແລະ ຂະຫຍາຍຕົວຫລາຍຂຶ້ນກວ່າເກົ່າ ເນື່ອງຈາກວ່າ ບັນດາປະເທດສະມາຊິກອາຊຽນ ພວມຈະກ້າວເຂົ້າສູ່ປະຊາຄົມເສດຖະກິດອາຊຽນທ້າຍປີ 2015 ນີ້ ບວກກັບ ສປປ ລາວ ໄດ້ເປັນສະມາຊິກຂອງອົງການໆຄ້າໂລກ, ຈະເປັນປະທານອາຊຽນໃນປີ 2016, ມີການເຊື່ອມໂຍງສູ່ສາກົນຫລາຍຂຶ້ນ. ສະນັ້ນ ອິນເດຍຍິ່ງໃຫ້ຄວາມສໍາຄັນຫລາຍເພີ່ມຂຶ້ນຫລາຍເທົ່າ, ໂດຍສະເພາະການປຶກສາຫາລື ແລະ ຂອບເຂດການຮ່ວມມືດ້ານການຄ້າ ແລະ ການທ່ອງທ່ຽວໃນຕໍ່ໜ້າ ວ່າພວກເຮົາຈະເຮັດແນວໃດເພື່ອລະດົມນັກລົງທຶນ ແລະ ປະຊາຊົນອິນເດຍເຂົ້າມາລົງທຶນ, ທໍາມາຄ້າ-ຂາຍຮ່ວມກັນ ລວມເຖິງການຢ້ຽມຢາມໄປມາຫາສູ່ກັນຫລາຍຂຶ້ນ.
0 comments:
Post a Comment