ຂົວມິດຕະພາບລາວ-ໄທແຫ່ງທີ 5 ຄືບໜ້າ 40% ກຽມເຊື່ອມຈອດໃນທ້າຍປີໜ້າ

ມາຮອດປັດຈຸບັນ, ໂຄງການກໍ່ສ້າງຂົວຂ້າມນໍ້າຂອງມິດຕະພາບລາວ-ໄທ ແຫ່ງທີ 5 (ບໍລິຄໍາໄຊ-ບຶງການ) ມີຄວາມຄືບໜ້າຢ່າງຕໍ່ເນື່ອງ ແລະ ລື່ນແຜນການທີ່ວາງໄວ້, ຖ້າການກໍ່ສ້າງທຸກຢ່າງເປັນໄປໄດ້ດ້ວຍດີ ຄາດວ່າໂຄງການນີ້ຈະສາມາດເຊື່ອມຂົວແຫ່ງນີ້ຕໍ່ກັນລະຫວ່າງຝັ່ງລາວ ແລະໄທພາຍໃນທ້າຍປີ 2023.

ທ່ານ ໄລທອງ ພົມມະວົງ, ຫົວໜ້າໂຄງການກໍ່ສ້າງຂົວຂ້າມນໍ້າຂອງມິດຕະພາບລາວ-ໄທ ແຫ່ງທີ 5 ໃຫ້ສໍາພາດຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ ໃນວັນທີ 20 ເມສາ 2022 ວ່າ: ໂຄງການດັ່ງກ່າວນີ້ເປັນໂຄງການທີ່ລັດຖະບານລາວ ໄດ້ຮັບເງິນກູ້ຢືມຈາກອົງການຄວາມຮ່ວມມືທາງດ້ານເສດຖະກິດກັບປະເທດເພື່ອນບ້ານ (ອົງການ NEDA) ຈາກປະເທດໄທ ຈໍານວນ 1.380.067.000 ບາດ (ສະກຸນເງິນໄທ). ການກໍ່ສ້າງຢູ່ຝັ່ງລາວ ໄດ້ເລີ່ມລົງມືແຕ່ວັນທີ 4 ມັງກອນ 2021 ໂດຍແບ່ງອອກເປັນສັນຍາ ຄື: ສັນຍາທີ 1: ສັນຍາກໍ່ສ້າງຂົວຂ້າມນໍ້າຂອງ ແລະ ສັນຍາທີ 2: ສັນຍາກໍ່ສ້າງທາງເຂົ້າຂົວ ແລະ ກໍ່ສ້າງອາຄານດ່ານກວດຄົນເຂົ້າ-ອອກເມືອງ. ຜ່ານການຈັດຕັ້ງປະຕິບັດທັງ 2 ສັນຍາມາຮອດປັດຈຸບັນ, ສັນຍາທີ 1 ສໍາເລັດແລ້ວ 28,58%, ລື່ນແຜນການ 11,58% ແລະ ສັນຍາທີ 2 ສໍາເລັດແລ້ວ 40,78%, ລື່ນແຜນການ 3,52%. ປັດຈຸບັນ ການກໍ່ສ້າງແມ່ນພວມເລັ່ງສຸມໃສ່ສັນຍາທີ 1 ເປັນສໍາຄັນ ໂດຍສະເພາະການເຈາະ ແລະ ເທເບຕົງເສົາເຂັມທີ່ຍັງເຫລືອຢູ່ເສົາຂົວກາງນ້ຳ 1 ຕົ້ນ ເພື່ອໃຫ້ສໍາເລັດກ່ອນທີ່ນ້ຳຈະຂຶ້ນສູງໃນລະດູຝົນທີ່ຈະມາເຖີງນີ້. ສ່ວນສັນຍາທີ 2 ແມ່ນສຸມໃສ່ການມຸງຫລັງຄາອາຄານດ່ານໃຫ້ສໍາເລັດກ່ອນລະດູຝົນເຊັ່ນດຽວກັນເພື່ອໃຫ້ສາມາດເຮັດວຽກຢູ່ໃນຕົວອາຄານໃຫ້ມີຄວາມສະດວກ.

ທ່ານໃຫ້ຮູ້ຕື່ມວ່າ: ສໍາລັບການກໍ່ສ້າງໃນສັນຍາທີ 1 ຄື: ກໍ່ສ້າງຂົວຂ້າມນໍ້າຂອງ ຈະໃຫ້ສໍາເລັດໃນທ້າຍປີ 2023 ແລະ ສັນຍາທີ 2 ຄື: ກໍ່ສ້າງທາງເຂົ້າຂົວ ແລະ ກໍ່ສ້າງອາຄານດ່ານກວດຄົນເຂົ້າ-ອອກເມືອງ ຈະໃຫ້ສໍາເລັດພາຍໃນກາງປີ 2023. ສໍາລັບຄວາມຫຍຸ້ງຍາກໃນການກໍ່ສ້າງ, ຍ້ອນການລະບາດຂອງພະຍາດໂຄວິດ-19 ເຮັດໃຫ້ການນໍາເຂົ້າບຸກຄະລາກອນ ແລະ ແຮງງານຂອງບໍລິສັດຮັບເໝົາກໍ່ສ້າງ ລວມທັງການນຳເຂົ້າພາຫະນະກົນຈັກ, ອູປະກອນເຄື່ອງມື ແລະ ວັດສະດຸກໍ່ສ້າງຈາກປະເທດໄທມີຄວາມຫຍຸ້ງຍາກ ແລະ ໃຊ້ເວລາດຳເນີນການພໍສົມຄວນ. ນອກຈາກນີ້ ແມ່ນບັນຫາໄພທໍາມະຊາດ, ເນື່ອງຈາກປີນີ້ຝົນຕົກກ່ອນລະດູການ ເຮັດໃຫ້ລະດັບນໍ້າຂອງບາງຄັ້ງຂຶ້ນສູງ ແລະ ເປັນອຸປະສັກຕໍ່ການກໍ່ສ້າງຢູ່ກາງນ້ຳ. ຢ່າງໃດກໍ່ຕາມ ຄະນະຮັບຜິດຊອບໂຄງການຈະສູ້ຊົນຈັດຕັ້ງປະຕິບັດທຸກໜ້າວຽກໃຫ້ສໍາເລັດຕາມແຜນການທີ່ຄາດໝາຍໄວ້.

ທ່ານ ໄລທອງ ພົມມະວົງ ໃຫ້ຮູ້ອີກວ່າ: ໂຄງການກໍ່ສ້າງຂົວຂ້າມນໍ້າຂອງມິດຕະພາບລາວ-ໄທ ແຫ່ງທີ 5 ຍັງບໍ່ທັນໄດ້ຮັບການວາງສີລາລຶກການກໍ່ສ້າງຢ່າງເປັນທາງການເທື່ອ ທັ້ງນີ້ ຍ້ອນການລະບາດຂອງພະຍາດໂຄວິດ-19, ຈຶ່ງໄດ້ເລື່ອນເວລາໄປ 2 ຄັ້ງແລ້ວ, ແຕ່ຄາດວ່າຖ້າການລະບາດຂອງພະຍາດດັ່ງກ່າວຫລຸດລົງພິທີວາງສີລາລຶກການກໍ່ສ້າງຈະຈັດຂຶ້ນພາຍໃນທ້າຍປີນີ້.

ໂຄງການກໍ່ສ້າງຂົວຂ້າມນໍ້າຂອງ ມິດຕະພາບ ລາວ-ໄທ ແຫ່ງທີ 5 (ບໍລິຄໍາໄຊ-ບຶງການ) ຕັ້ງຢູ່ເຂດບ້ານກ້ວຍອຸດົມ ເມືອງປາກຊັນ, ແຂວງບໍລິຄໍາໄຊ, ມີຄວາມຍາວທັງໝົດ 1.350 ແມັດ, ໃນນີ້ ຝັ່ງລາວມີຄວາມຍາວ 535 ແມັດ, ມູນຄ່າການລົງທຶນລວມທັງໝົດ 3.930 ລ້ານບາດ, ໃນນີ້ ການກໍ່ສ້າງຢູ່ຝັ່ງລາວ 1.380.067.000 ບາດ, ເຫລືອນັ້ນແມ່ນມູນຄ່າການກໍ່ສ້າງຢູ່ເບື້ອງຝັ່ງໄທ ມີໄລຍະການກໍ່ສ້າງ 36 ເດືອນ.

Share on Google Plus

About StanG

ສະບາຍດີ ສະຖານີວິທະຍຸ ຊາວໜຸ່ມລາວ ສິນໄຊຍຸກໃໜ່ ແມ່ນສະຖານີສໍາຫຼັບຄົນໜຸ່ມ ແລະ ຫົວໃຈຍັງໜຸ່ມ, ກະຈາຍສຽງຈາກນະຄອນຫຼວງວຽງຈັນ, ສປປ ລາວ. Lao Youth Radio Station is a station for young and young at heart listeners, broadcasting from Vientiane Capital, Lao PDR.