ໄຂມັນໃນຮ່າງກາຍຂອງຄົນເຮົາ ເກີດມາຈາກອາຫານທີ່ກິນໃນແຕ່ລະມື້, ອາຫານທຸກຄາບແລ້ວແຕ່ມີໄຂມັນເປັນສ່ວນປະກອບໄດ້ແກ່ໄຂມັນນຳຊີ້ນສັດ ແລະ ໄຂມັນນຳພືດ ເຊິ່ງກະເພາະອາຫານ ແລະ ລຳໃສ້ ເຮັດໜ້າທີ່ຍ່ອຍແລ້ວດູດຊຶມເຂົ້າສູ່ເສັ້ນເລືອດ ຫລັງຈາກນັ້ນ ຮ່າງກາຍຈະນຳໄປໃຊ້ເປັນພະລັງງານທີ່ມີປະໂຫຍດ, ແຕ່ຖ້າໄຂມັນໃນຮ່າງກາຍ ມີຫລາຍເກີນໄປກໍບໍ່ສາມາດປ່ຽນເປັນພະລັງງານໄດ້ໝົດ ຈຶ່ງຖືກເກັບສະສົມໄວ້ໃນຮ່າງກາຍ ແລະ ເຮັດໃຫ້ເຮົາຕຸ້ຍຂຶ້ນໂດຍບໍ່ຮູ້ໂຕ.
ໄຂມັນໃນເສັ້ນເລືອດມີ 2 ປະເພດຄື:ໄຂມັນຄໍເລສເຕີຣໍ ຕາມປົກກະຕິແລ້ວໃນຮ່າງກາຍຈະມີປະມານ 150-200 ມິລິກຣາມ ແລະ ໄຕຣກີເຊີໄຣ ປະມານ 100 ມິລິກຣາມ, ດັ່ງນັ້ນ ຖ້າໄຂມັນໂຄເລັສເຕີຣໍ ໃນຮ່າງກາຍມີຫລາຍກວ່າ 200 ແລະ ໄຕຣກີເຊີໄຣ ຫລາຍກວ່າ 100 ຈະເປັນອັນຕະລາຍຕໍ່ສຸຂະພາບສົ່ງຜົນເຮັດໃຫ້ຫົວໃຈຂາດເລືອດ, ເສັ້ນເລືອດຕັນ ແລະ ເປັນອັນຕະລາຍເຖິງແກ່ຄວາມຕາຍໄດ້. ແຕ່ກົງກັນຂ້າມ ຖ້າການໄຫລວຽນຂອງເລືອດຊັກຊ້າລົງຈະເຮັດໃຫ້ໄຂມັນ ໄປເກາະຕິດຕາມເສັ້ນເລືອດພາໃຫ້ເສັ້ນເລືອດແຂງ ແລະ ໜາຂຶ້ນໄດ້ ເຊິ່ງເປັນສາເຫດພາໃຫ້ເລືອດລຳລຽງໄປລ້ຽງສະໝອງ ແລະ ຫົວໃຈນ້ອຍລົງ. ພະຍາດນີ້ສາມາດປ້ອງກັນໄດ້ດ້ວຍຕົນເອງຄື ອອກກຳລັງກາຍໃຫ້ສະໝ່ຳສະເໝີ, ກວດເບິ່ງໄຂມັນຕະຫລອດ, ເຊົາສູບຢາ, ບໍ່ກິນອາຫານທີ່ມີໄຂມັນຫລາຍເຊັ່ນ: ບໍ່ກິນຊີ້ນສັດທີ່ມີໄຂມັນຫລາຍ, ຂະໜົມຫວານ, ກະທິໝາກພ້າວ, ໄຂ່ແດງ, ສະໝອງສັດ, ຊາ, ກາເຟ ແລະ ເຄື່ອງດື່ມທີ່ມີສານເຫລົ້ານີ້ເປັນຕົ້ນ.
ຂປລ
0 comments:
Post a Comment