ບໍລິສັດເບຍລາວ ຈໍາກັດ ສົມທົບທຶນ 3.4 ຕື້ກ່ວາກີບ ເຂົ້າໃນການບູລະນະ 3 ສວນສາທາລະນະ!!!


ວຽກງານປົກປັກຮັກສາ ສິ່ງແວດລ້ອມ ເປັນໜຶ່ງໃນວຽກງານປາຍແຫຼມ ທີ່ທາງບໍລິສັດເບຍລາວ ຈໍາກັດ ໄດ້ໃຫ້ຄວາມສໍາຄັນ ອັນດັບຕົ້ນໆ ຕະຫຼອດມາ, ໂດຍນັບຕັ້ງແຕ່ປີ 2007-2020, ບໍລິສັດເບຍລາວ ຈໍາກັດ ໄດ້ປະກອບສ່ວນທຶນຮອນ ເຂົ້າໃນວຽກງານ ການບົວລະບັດຮັກສາ ສວນສາທາລະນະ 3 ແຫ່ງໃນນະຄອນຫຼວງວຽງຈັນ ປະກອບມີ: ສວນອານຸສອນ ເຈົ້າຟ້າງຸ່ມ, ສວນວົງວຽນຈີ່ນາຍໂມ້ ແລະ ສວນວົງວຽນ 450 ປີ (ຖະໜົມໄກສອນ ພົມວິຫານ) ໄປແລ້ວຫຼາຍ ກ່ວາ 3.4 ຕື້ກີບ. 



ໃນຕອນເຊົ້າວັນທີ 18 ກໍລະກົດ 2020, ບໍລິສັດ ເບຍລາວ ຈຳກັດ ຮ່ວມກັບ ຫ້ອງການຄຸ້ມຄອງ ແລະ ບໍລິຫານຕົວເມືອງວຽງຈັນ (ຄບຕ.ວຈ) ແລະ ບໍລິສັດ ສຸກປັນຍາ ກໍ່ສ້າງ ໄດ້ຮ່ວມກັນ ຈັດກິດຈະກຳອອກແຮງງານລວມ ທີ່ ສວນວົງວຽງຈີ່ນາຍໂມ້, ໂດຍມີຈຸດປະສົງເພື່ອປັບປຸງສວນວົງວຽນໂມງຈີ່ນາຍໂມ້ ໃຫ້ມີຄວາມສວຍງາມ ສະອາດ ງາມຕາ, ພ້ອມທັງປັບປຸງ ສ່ວນທີ່ມີການເປເພ່ ເສຍຫາຍ ຈຳນວນໜຶ່ງ.  ກິດຈະກໍາອອກແຮງງານລວມ ໃນເທື່ອນີ້ ແມ່ນເພື່ອຜັນຂະຫຍາຍ 6 ສ ຂອງນະຄອນຫຼວງວຽງຈັນ ໃຫ້ປະກົດຜົນເປັນຈິງເທື່ອລະກ້າວ ໂດຍສະເພາະແມ່ນ ສ ສີຂຽວ ແລະ ສ ສະອາດ. 





ທ່ານ ບຸນຈັນ ແກ້ວສີທຳມະ ຫົວໜ້າຫ້ອງການຄຸ້ມຄອງ ແລະ ບໍລິຫານຕົວເມືອງວຽງຈັນ ໄດ້ແຈ້ງໃຫ້ຊາບວ່າ ທາງບໍລິສັດເບຍລາວ ໄດ້ໃຫ້ການສະໜັບສະໜູນງົບປະມານ ໃນການບູລະນະຮັກສາສວນສາທາລະນະ 3 ແຫ່ງດັ່ງກ່າວ ກວມເອົາເນື້ອທີ່ທັງໝົດ  9.165 ຕາແມັດ ເຊິ່ງຜ່ານມາ ໄດ້ຮັບການສ້ອມແປງບູລະນະທັງໝົດ 3 ຄັ້ງ. ກິດຈະກໍາຫຼັກໆ ໃນການບູລະນະ ສວນສາທາລະນະ ທັງສາມແຫ່ງປະກອບມີ ການສ້ອມແປງລະບົບໄຟຟ້າ, ການປັບປຸງອ່າງນໍ້າພຸ, ການທາສີ, ການເຮັດກະຕ່າຂີ້ເຫຍື້ອໃສ່ສວນ, ການປູກຕົ້ນໄມ້ປະດັບ, ການທໍາຄວາມສະອາດ, ການຕັດຫຍ້າ, ການຫົດນໍ້າຕົ້ນໄມ້ ແລະ ອື່ນໆ. 



ທ່ານຍັງໄດ້ກ່າວຕື່ມອີກວ່າ: ເນື່ອງຈາກງົບປະມານໃນການບົວລະບັດຮັກສາສວນສາທາລະນະໃນຕົວເມືອງຂອງພວກເຮົາມີຈຳນວນຈຳຈັດ ແລະ ຍັງມີອີກຫຼາຍສວນສາທາລະນະ ທີ່ຍັງຕ້ອງການງົບປະມານ ມາບູລະນະຮັກສາໃຫ້ສວຍງາມ, ສະນັ້ນ ຈື່ງຢາກຮຽນເຊີນ ທຸກພາກສ່ວນ ເຂົ້າຮ່ວມ ອຸປະຖຳບົວລະບັດຮັກສາສວນສາທາລະນະ ເພື່ອຊ່ວຍກັນ ຮັກສາສິ່ງແວດລ້ອມຕົວເມືອງ ໃຫ້ມີຄວາມສະອາດ ຈົບງານ ຄືກັນກັບບໍລິສັດ ເບຍລາວ ຈໍາກັດ ທີ່ເຫັນຄວາມສໍາຄັນ ແລະ ໄດ້ເອົາໃຈໃສ່ປະກອບສ່ວນ ດ້ວຍດີ ຕະຫຼອດມາ.





Share on Google Plus

About laoyouthradio

ສະບາຍດີ ສະຖານີວິທະຍຸ ຊາວໜຸ່ມລາວ ສິນໄຊຍຸກໃໜ່ ແມ່ນສະຖານີສໍາຫຼັບຄົນໜຸ່ມ ແລະ ຫົວໃຈຍັງໜຸ່ມ, ກະຈາຍສຽງຈາກນະຄອນຫຼວງວຽງຈັນ, ສປປ ລາວ. Lao Youth Radio Station is a station for young and young at heart listeners, broadcasting from Vientiane Capital, Lao PDR.
    Blogger Comment
    Facebook Comment

0 comments:

Post a Comment