ສະມາຄົມປ້າຍລາວ ຮຽກຮ້ອງມາຍັງພາກສ່ວນທີ່ກ່ຽວຂ້ອງຂອງລັດຖະບານ ຊ່ວຍແກ້ໄຂບັນຫາຜູ້ປະກອບດ້ານປ້າຍໂຄສະນາບໍ່ຖືກຕ້ອງ ເພາະສົ່ງຜົນກະທົບໂດຍກົງຕໍ່ຜູ້ປະກອບການທີ່ມີໃບອະນຸຍາດດໍາເນີນກິດຈະການຢ່າງຖືກຕ້ອງຕາມລະບຽບການ ແລະ ເພື່ອເຮັດໃຫ້ລັດຖະບານ ໄດ້ຮັບຜົນປະໂຫຍດນໍາຜູ້ປະກອບການເຫລົ່ານີ້ໃຫ້ໄດ້ຫລາຍເທົ່າທີ່ຈະຫລາຍໄດ້.
ທ່ານ ວົງນໍາ ວົງວິໄລ, ປະທານສະມາຄົມປ້າຍລາວ ໃຫ້ສໍາພາດຕໍ່ສື່ມວນຊົນວ່າ: ປັດຈຸບັນ ຜູ້ປະກອບການ ດ້ານປ້າຍໂຄສະນາ ມີຫລາຍ ແລະ ກະແຈກກະຈາຍໃນທົ່ວປະເທດ, ມີທັງຈົດທະບຽນຖືກຕ້ອງ ແລະ ບໍ່ຖືກຕ້ອງຕາມລະບຽບການ ເຮັດໃຫ້ເກີດມີຫລາຍບັນຫາຕາມມາ ເປັນຕົ້ນ: ຜູ້ປະກອບການບໍ່ຖືກຕ້ອງ ຍາດແຍ່ງເອົາວຽກອອກປ້າຍນໍາພາກສ່ວນຕ່າງໆ ແລ້ວໄປເຮັດເອງຢູ່ເຮືອນຂອງຕົນ ເຮັດໃຫ້ລັດຖະບານບໍ່ມີລາຍຮັບຫຍັງນໍາເຂົາເຈົ້າ ຍ້ອນບໍ່ໄດ້ເສຍພາສີອາກອນຫຍັງ. ແຕ່ບັນຫາສໍາຄັນ ມີຄົນຕ່າງປະເທດເຂົ້າມາຍາດແຍ່ງຫາກິນດ້ານນີ້ຢູ່ລາວ ດ້ວຍການມານໍາບັນດາໂຄງການໃຫຍ່, ເຂົ້າມາແລ້ວຕັ້ງບໍລິສັດເຮັດປ້າຍຂຶ້ນນໍາໂຄງການ ພໍແລ້ວໂຄງການກໍນໍາເງິນກັບຄືປະເທດເຂົາເຈົ້າຈໍານວນຫລວງ ຫລາຍໃນແຕ່ລະປີ ເຮັດໃຫ້ຜູ້ປະກອບການດ້ານປ້າຍຢູ່ລາວ ທັງເປັນສະມາຊິກ ແລະ ບໍ່ແມ່ນສະມາຊິກຂອງສະມາຄົມ ບໍ່ສາມາດເຂົ້າເຖີງບັນດາໂຄງການໃຫຍ່. ນອກຈາກນີ້ ຈໍານວນໜຶ່ງທີ່ມີໃບອະນຸຍາດດໍາເນີນທຸລະກິດອອກຊື່ຄົນລາວ ແຕ່ໃຫ້ຄົນຕ່າງປະເທດດໍາເນີນກິດຈະການ ແລະ ມີບາງຈໍານວນເປີດຂາຍອຸປະກອນການຜະລິດປ້າຍໄປພ້ອມ ເຮັດໃຫ້ຕົ້ນທຶນການຜະລິດປ້າຍຂອງເຂົາເຈົ້າຖືກກວ່າທີ່ຜູ້ປະກອບການຂອງລາວຜະລິດ, ເຖີງວ່າທີ່ເຂົາເຈົ້າຜະລິດບໍ່ໄດ້ຄຸນນະພາບ ຍ້ອນຊ້ຕົ້ນທຶນຕໍ່າ ແຕ່ສັງຄົມມີຄວາມຕ້ອງການຍ້ອນມີລາຄາຖືກ ຈິ່ງເຮັດໃຫ້ມີຜົນກະທົບໂດຍກົງຕໍ່ການຢູ່ລອດຂອງບາງຜູ້ປະກອບການດ້ານປ້າຍຢູ່ລາວທີ່ມີງົບປະມານຈໍາກັດ.
ທ່ານ ວົງນໍາ ວົງວິໄລ ໃຫ້ຮູ້ຕື່ມວ່າ: ຕໍ່ບັນຫາທີ່ເກີດຂຶ້ນ, ສະມາຄົມປ້າຍລາວ ໄດ້ສະເໜີນໃນກອງປະຊຸມວຽກງານຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ປະຈໍາປີ 2021 ຈັດຂຶ້ນຢູ່ນະຄອນຫລວງວຽງຈັນ ເມື່ອບໍ່ດົນມານີ້ ເພື່ອໃຫ້ແຕ່ງຕັ້ງຄະນະຮັບຜິດຊອບເຄື່ອນໄຫວກວດກາບັນດາຜູ້ປະກອບການດ້ານປ້າຍໂຄສະນາຢູ່ທົ່ວປະເທດ ເພື່ອເຮັດໃຫ້ຜູ້ປະກອບການໄດ້ມີໃບທະບຽນອະນຸຍາດດໍາເນີນທຸລະກິດຢ່າງຖືກຕ້ອງ, ພ້ອມທັງຊ່ວຍປຸກລະດົມໃຫ້ຜູ້ປະກອບການເຂົ້າມາຮ່ວມເປັນສະມາຊິກຂອງສະມາຄົມປ້າຍລາວ ເພື່ອສະດວກໃນການຄຸ້ມຄອງ ແລະ ເຮັດໃຫ້ລັດຖະບານໄດ້ຮັບຜົນປະໂຫຍດນໍາ. ນອກຈາກນີ້ ສະມາຄົມປ້າຍລາວ ຈະສືບຕໍ່ສະເໜີລັດຖະບານໃຫ້ກໍານົດເອົາທຸລະກິດດ້ານປ້າຍ ເປັນອາຊີບສະຫງວນໄວ້ໃຫ້ຄົນລາວ ເພາະສີມືການຜະລິດປ້າຍໂຄສະນາຂອງຄົນລາວໃນປັດຈຸບັນ ແມ່ນບໍ່ນ້ອຍໜ້າສີຂອງຄົນຕ່າງປະເທດ, ທັງນີ້ ເພື່ອແນໃສ່ເຮັດໃຫ້ຄົນລາວໄດ້ມີວຽກເຮັດງານທໍາໃນດ້ານນີ້ ແລະ ເຮັດໃຫ້ລັດຖະບານໄດ້ມີລາຍຮັບໃນດ້ານນີ້ນັບມື້ຫລາຍຂຶ້ນກວ່າເກົ່າ.
ສໍາລັບສະມາຄົມປ້າຍລາວ ໄດ້ຮັບການສ້າງຕັ້ງຂຶ້ນໃນວັນທີ 20 ກຸມພາ 2020. ມາຮອດປັດຈຸບັນ ມີສະມາ ຊິກທັງໝົດ 40 ຮ້ານໃນທົ່ວປະເທດ.
0 comments:
Post a Comment