“ພະລັງຂອງຄຳວ່າ ບໍ່” – ການປະກວດຮູບຖ່າຍລະດັບສາກົນດ້ວຍຄວາມຄິດໃໝ່ເພື່ອເປັນການສະເຫຼີມສະຫຼອງ ຜູ້ຊະນະການຕໍ່ສູ້ກັບບັນຫາການດື່ມແລ້ວຂັບ ໃນລາວ
ການຮ່ວມມື ຫຼາຍພາກສ່ວນທີ່ມາຈາກບັນດາອົງກອນຊຸມຊົນ, ທຸລະກິດ, ສະມາຄົມ ແລະ ລັດຖະບານຈຳນວນ 28 ແຫ່ງໃນທົ່ວອາຊີຕາເວັນອອກສຽງໃຕ້ ກໍາລັງໝູນໃຊ້ພະລັງແຫ່ງການຮ່ວມມື ເພື່ອຮັບມືກັບບັນຫາການດື່ມແລ້ວຂັບໃນກຸ່ມເຍົາວະຊົນຊາວໜຸ່ມ
ໃນວັນທີ XX ທັນວາ 2022 – ທີ່ ນະຄອນຫຼວງວຽງຈັນ – ມີເຍົາວະຊົນຊາວໜຸ່ມຈຳນວນຫຼາຍຮ້ອຍຄົນໃນທົ່ວອາຊີຕາເວັນອອກສຽງໃຕ້ ໄດ້ເຂົ້າປະກວດຮູບຖ່າຍລະດັບສາກົນ ທີ່ເນັ້ນໃສ່ຫົວຂໍ້ “ໝູ່ບໍ່ປ່ອຍໃຫ້ໝູ່ເມົາແລ້ວຂັບ” ເຊິ່ງເປັນສ່ວນໜຶ່ງຂອງແຄມເປນ “ພະລັງຂອງຄຳວ່າ ບໍ່” ໃນການຕ້ານການດື່ມແລ້ວຂັບ. ໃນມື້ດຽວກັນນີ້, ມີບັນດາຄູ່ຮ່ວມມືຫຼາຍພາກສ່ວນຈຳນວນ 28 ແຫ່ງຈະພ້ອມພຽງກັນມາເຕົ້າໂຮມກັນ ເພື່ອສະເຫຼີມສະຫຼອງຄວາມຄິດສ້າງສັນ, ພະລັງ ແລະ ຄວາມມຸ່ງໝັ້ນຂອງເດັກໄວໜຸ່ມທີ່ຈະເວົ້າວ່າ "ບໍ່" ຕໍ່ການດື່ມແລ້ວຂັບ. ໜ່ວຍກູ້ໄພນະຄອນຫຼວງວຽງຈັນ 1623 ແລະ ບໍລິສັດ ອາດີເຄ ກຣຸບ ໂດຍໄດ້ຮັບການສະໜັບສະໜູນຈາກສະຖານທູດອັງກິດປະຈຳນະຄອນຫຼວງວຽງຈັນ ແລະ ຄູ່ຮ່ວມມືໃນການຈັດຕັ້ງປະຕິບັດຂອງຕົນ ກໍຄື ສະມາຄົມລົດຍົນແຫ່ງ ສສ ຫວຽດນາມ (AAV) ໄດ້ມາເຕົ້າໂຮມກັນ ເພື່ອສຶກສາອົບຮົມບັນດາຊາວໜຸ່ມເຍົາວະຊົນ ກ່ຽວກັບໄພອັນຕະລາຍທີ່ອາດເກີດຈາກການດື່ມແລ້ວຂັບ. ໄດ້ຮ່ວມເປັນທີມດຽວກັນກັບບັນດາຄູ່ຮ່ວມມືລະດັບສາກົນ. ແຄມເປນດັ່ງກ່າວໄດ້ຮັບການສະໜັບສະໜູນຈາກ ພັນທະມິດຜູ້ຄ້າເຫຼົ້າ ແລະ ເຫຼົ້າແວງສາກົນໃນພາກພື້ນອາຊີ-ປາຊີຟິກ (APISWA) ແລະ ໜ່ວຍງານສ້າງສັນ Orès ໂດຍໄດ້ຮັບການຮັບຮອງຈາກສະຖາບັນການຝຶກອົບຮົມ ແລະ ການຄົ້ນຄວ້າຂອງສະຫະປະຊາຊາດ (UNITAR), ສະພາທຸລະກິດສະຫະລັດ-ອາຊຽນ (US-ABC) ແລະ EU - ສະພາທຸລະກິດອີຢູ-ອາຊຽນ (EU-ABC).
ພວກເຮົາກໍາລັງສູນເສຍຄົນລຸ້ນຕໍ່ໄປຂອງພວກເຮົາໃນອັດຕາທີ່ໜ້າເປັນຫ່ວງ.
ໃນປັດຈຸບັນນີ້ ການບາດເຈັບຈາກການຈະລາຈອນຕາມທ້ອງຖະໜົນແມ່ນເປັນສາເຫດອັນດັບຕົ້ນໆຂອງການເສຍຊີວິດໃນກຸ່ມເຍົາວະຊົນຊາວໜຸ່ມທີ່ມີອາຍຸຕໍ່າກວ່າ 30 ປີ ໃນທົ່ວໂລກ. ໃນອາຊີຕາເວັນອອກສຽງສຽງໃຕ້, ອຸປະຕິເຫດຕາມທ້ອງ ຖະໜົນໄດ້ພາກຊີວິດຂອງຜູ້ຄົນຈຳນວນ 2,000 ຄົນໃນແຕ່ລະວັນ. ຢູ່ປະເທດລາວ, 22% ຂອງການບາດເຈັບຈາກອຸປະຕິເຫດຕາມທ້ອງຖະໜົນຂອງກຸ່ມຜູ້ຊາຍ ແລະ 32% ຂອງການບາດເຈັບຈາກອຸປະຕິເຫດຕາມທ້ອງຖະໜົນຂອງກຸ່ມຜູ້ຍິງແມ່ນມີຄວາມກ່ຽວຂ້ອງກັບເຫຼົ້າ. ນອກຈາກນັ້ນ ອີງຕາມຂໍ້ມູນຈາກອົງການອະນາໄມໂລກ, 50% ຂອງການເສຍຊີວິດຈາກການຈະລາຈອນຕາມທ້ອງຖະໜົນຂອງປະເທດລາວແມ່ນມີຄວາມກ່ຽວຂ້ອງກັບເຫຼົ້າ. ຜູ້ທີ່ມີຄວາມສ່ຽງສູງທີ່ສຸດແມ່ນກຸ່ມເຍົາວະຊົນຊາວໜຸ່ມໃນໄວອາຍຸ 20 ປີ - ເຊິ່ງກຳລັງເປັນບຸກຄົນທີ່ມີຄວາມກະຕືລືລົ້ນ ແລະ ມີຄວາມສົດໃສ ທີ່ຫາກໍເລີ່ມຕົ້ນສ້າງອະນາຄົດຂອງເຂົາເຈົ້າ.
ຄວາມປອດໄພຕາມທ້ອງຖະໜົນ ແມ່ນຄວາມຮັບຜິດຊອບຮ່ວມກັນຂອງພວກເຮົາ. ພາກລັດ, ອົງການຈັດຕັ້ງທາງສັງຄົມ ແລະ ພາກເອກະຊົນລ້ວນແຕ່ຕ້ອງມີບົດບາດໃນການຫຼຸດຜ່ອນການເສຍຊີວິດ ແລະ ການບາດເຈັບເຫຼົ່ານີ້ ເພື່ອບັນລຸ ເປົ້າໝາຍການພັດທະນາແບບຍືນຍົງທີ 3 ຂອງອົງການສະຫະປະຊາຊາດ, ເຊິ່ງມີເປົ້າໝາຍທີ່ຈະຫຼຸດຈຳນວນຜູ້ເສຍຊີວິດ ແລະ ບາດເຈັບຈາກອຸປະຕິເຫດຕາມ ທ້ອງຖະໜົນໃຫ້ໄດ້ເຄິ່ງໜຶ່ງພາຍໃນປີ 2030.
ສ້າງຄວາມເຂັ້ມແຂງໃຫ້ແກ່ເຍົາວະຊົນຊາວໜຸ່ມເພື່ອປົກປ້ອງບັນດາໝູ່ເພື່ອນ ແລະ ຕົວເຂົາເຈົ້າເອງ.
ແຄມເປນປູກຈິດສຳນຶກໃຫ້ແກ່ສາທາລະນະ ພາຍໃຕ້ຫົວຂໍ້ “ພະລັງຂອງຄຳວ່າ ບໍ່” ແມ່ນຄວາມພະຍາຍາມຂອງພາກພື້ນ ທີ່ແນໃສ່ການຍົກລະດັບຈິດສຳນຶກໃຫ້ແກ່ບັນດາຊາວໜຸ່ມທີ່ຢູ່ໃນໄວດື່ມເຫຼົ້າ (ອາຍຸ 18-30 ປີ) ກ່ຽວກັບຜົນຕາມມາອັນຮ້າຍແຮງຂອງການດື່ມແລ້ວຂັບ. ແຄມເປນນີ້ໄດ້ເສີມຂະຫຍາຍຂໍ້ຄວາມໃນກຸ່ມຊາວໜຸ່ມທີ່ວ່າ ການດື່ມແລ້ວຂັບແມ່ນສິ່ງທີ່ບໍ່ສາມາດເປັນທີ່ຍອມຮັບໄດ້ໃນສັງຄົມ, ຊ່ວຍເຂົາເຈົ້າໃຫ້ມີການເລືອກແບບມີຂໍ້ມູນທີ່ດີຂຶ້ນກວ່າເກົ່າ ແລະ ໃນທີ່ສຸດກໍຄື ສາມາດຮັກສາຊີວິດຄົນໄດ້. ຂໍ້ລິເລີ່ມໃນການນຳໃຊ້ສື່ສັງຄົມອອນລາຍທີ່ມີຄວາມສ້າງສັນ ໄດ້ເຂົ້າເຖິງບັນດາຊາວໜຸ່ມໃນໄວອາຍຸດື່ມເຫຼົ້າຖືກກົດໝາຍກວ່າ 30 ລ້ານຄົນ ນັບແຕ່ໄດ້ເປີດຕົວໃນຕົ້ນປີ 2022 ຢູ່ປະເທດລາວ ໂດຍມີການເຂົ້າເຖິງລະດັບພາກພື້ນໄປຍັງກຳປູເຈຍ, ມາເລເຊຍ, ຟີລິບປິນ, ໄທ ແລະ ຫວຽດນາມ.
ແຄມເປນນີ້ ໄດ້ເປີດຕົວການປະກວດຮູບຖ່າຍໃນລະດັບສາກົນ ໃນລະດູໃບໄມ້ລົ່ນນີ້ພາຍໃຕ້ຫົວຂໍ້ “ໝູ່ບໍ່ປ່ອຍໃຫ້ໝູ່ເມົາແລ້ວຂັບ.” ໂດຍຜ່ານຍຸດທະສາດການນຳໃຊ້ສື່ສັງຄົມອອນລາຍເຂົ້າຫາກຸ່ມເປົ້າໝາຍ ແລະ ການຕະຫຼາດໂດຍໃຊ້ຜູ້ທີ່ມີອິດທິພົນ, ການແຂ່ງຂັນ ໄດ້ເຂົ້າເຖິງບັນດາໄວໜຸ່ມຫຼາຍກວ່າ 7 ລ້ານຄົນ ພ້ອມດ້ວຍ ຍອດກົດຖືກໃຈ, ຄຳຄິດເຫັນ ແລະ ແບ່ງປັນຫຼາຍກວ່າ 450,000 ຄັ້ງ ໃນເວລາສອງເດືອນທົ່ວທັງ Facebook, Instagram, Tik Tok ແລະ PartiPost. ການປະກວດ ຕັ້ງຄຳຖາມວ່າ: ທ່ານຮູ້ບໍວ່າ ໝູ່ຄົນນັ້ນມັກເມົາແລ້ວຂັບກັບບ້ານຢູ່ສະເໝີ? ແບ່ງປັນເຄັດລັບທີ່ດີທີ່ສຸດຂອງທ່ານໃຫ້ແກ່ພວກເຮົາ ເພື່ອປ້ອງກັນບໍ່ໃຫ້ເຂົາເຈົ້າຂັບລົດ ແລະ ໄດ້ຮັບລາງວັນທີ່ສຸດຍອດ. ຜູ້ເຂົ້າປະກວດໄດ້ສົ່ງຮູບພາບທີ່ສະແດງໃຫ້ເຫັນເຖິງຄວາມຄິດສ້າງສັນຂອງພວກເຂົາໃນການຫ້າມໝູ່ບໍ່ໃຫ້ເມົາແລ້ວຂັບ.
ບັນດາຜູ້ເຂົ້າປະກວດໄດ້ຮັບການຊຸກຍູ້ໃຫ້ແບ່ງປັນຮູບພາບທີ່ເຂົາເຈົ້າສົ່ງເຂົ້າຮ່ວມການປະກວດຈາກເພດຈ໌ Facebook ຂອງແຄມເປນດັ່ງກ່າວ, ເນື່ອງຈາກວ່າຮູບພາບທີ່ໄດ້ຮັບຍອດກົດຖືກໃຈ, ຄໍາຄິດເຫັນ ແລະ ການແບ່ງປັນທີ່ບໍ່ຜ່ານການຍິງໂຄສະນາຫຼາຍທີ່ສຸດຈະໄດ້ຮັບລາງວັນ "ການໂຫວດຈາກປະຊາຊົນ" ເຊິ່ງເປັນ iPhone 13ເຄື່ອງໃໝ່. ນອກຈາກນັ້ນ, ບັນດາຮູບພາບກໍຍັງຈະໄດ້ຮັບການກວດສອບໂດຍ ບັນດາຄະນະກຳມະການທີ່ມາຈາກບັນດາຜູ້ຊ່ຽວຊານ ແລະ ຜູ້ສະໜັບສະໜູນດ້ານຄວາມປອດໄພຕາມທ້ອງຖະໜົນລະດັບສາກົນ, ເຊິ່ງຈະເປັນຜູ້ໃຫ້ລາງວັນທີ່ປະກອບດ້ວຍ Apple Watch Series 7 ໃໝ່, ລໍາໂພງໄຮ້ສາຍ Amazon Echo Dot ແລະ ບັດຂອງຂວັນ ທີ່ໃຊ້ໄດ້ກັບກັບແອັບຮຽກລົດບໍລິການໂດຍສານ. ແຕ່ລະປະເທດທີ່ເຂົ້າຮ່ວມແຄມເປນຈະໄດ້ຮັບ 6 ລາງວັນ, ລວມຜູ້ຊະນະການປະກວດທັງໝົດ 30 ຄົນ.
ເພື່ອໃຫ້ຄະແນນແກ່ຜົນງານການປະກວດ, ຜູ້ຊ່ຽວຊານດ້ານການຖ່າຍຮູບ ທ່ານ Jason Rolan ໄດ້ຮັບໜ້າທີ່ເປັນຄະນະກຳມະການຊ່ຽວຊານນຳ. ທ່ານ Rolan ແມ່ນຄູ່ຮ່ວມມືອາວຸໂສກຂອງກຸ່ມບໍລິສັດ RDK ປະຈຳລາວ. ທ່ານ Rolan ໄດ້ອອກຈາກບ້ານເກີດເມືອງນອນຂອງຕົນຢູ່ລັດ Texas ໄດ້ເກືອບສອງທົດສະວັດ ແລ້ວ ເພື່ອເຮັດວຽກໃນດ້ານການທ່ອງທ່ຽວຢູ່ປະເທດໄທ. ໃນທີ່ສຸດ ກໍໄດ້ຍ້າຍຖິ່ນຖານມາຕັ້ງຫຼັກຢູ່ປະເທດລາວ, ທ່ານໄດ້ສຳຫຼວດ ແລະ ຖ່າຍຮູບຂອງປະເທດລາວ ແລະ ປະເທດອື່ນໆໃນອາຊີຕາເວັນອອກສຽງໃຕ້ຢູ່ເລື້ອຍໆ. ດ້ວຍຄວາມສາມາດໃນການເວົ້າພາສາໄທ ແລະ ພາສາລາວໄດ້ຢ່າງຄ່ອງແຄ້ວ, ທ່ານຈຶ່ງໄດ້ເປັນທັງຫົວໜ້າບັນນາທິການຂອງວາລະສານຈຳປາເມືອງລາວ, ເຊິ່ງເປັນວາລະສານປະຈຳຖ້ຽວບິນຂອງສາຍການບິນລາວ. ນອກຈາກນັ້ນ, ບັນດາຄະນະກຳມະການກໍຍັງໄດ້ລວມ ເອົາທັດສະນະຕ່າງໆລະດັບສາກົນ ຈາກປະເທດຝຣັ່ງ, ສະຫະລັດອາຣັບເອມີເຣດ, ສິງກະໂປ, ກຳປູເຈຍ, ມາເລເຊຍ, ຟີລິບປິນ, ໄທ ແລະ ຫວຽດນາມ ອີກດ້ວຍ. ຮຽນຮູ້ເພີ່ມຕື່ມກ່ຽວກັບບັນດາສະມາຊິກຄະນະກຳມະການທີ່ໜ້ານັບຖືທັງຫຼາຍຢູ່ຂ້າງລຸ່ມນີ້.
ຮູບພາບທີ່ໄດ້ຮັບ ການໂຫວດຈາກປະຊາຊົນ ທີ່ໄດ້ຮັບຄະແນນນິຍົມຫຼາຍທີ່ສຸດໃນປະເທດລາວແມ່ນມາຈາກ ດາລຸນີ ຈະເລີນຜົນ (Daruni Charoenphon), ທີ່ໄດ້ສະແດງໃຫ້ເຫັນວ່າຜູ້ກ່ຽວຈະຮັກສາ ມີສະຕິໄວ້ ແລະ ຂັບລົດໄປສົ່ງໝູ່ກັບບ້ານຫຼັງຈາກທີ່ໝູ່ເມົາຫຼາຍເກີນໄປແລ້ວ. ໂພສຂອງຜູ້ກ່ຽວໄດ້ຮັບຍອດກົດຖືກໃຈ 350 ຄັ້ງ, ຄຳຄິດເຫັນ 48 ຄັ້ງ ແລະ ແບ່ງປັນ 123 ຄັ້ງ, ເຮັດໃຫ້ຜູ້ກ່ຽວໄດ້ຮັບ Apple iPhone 13 ເຄື່ອງໃໝ່ເປັນລາງວັນ. ຮູບພາບທີ່ໄດ້ຮັບລາງວັນທີໜຶ່ງ ແມ່ນສົ່ງເຂົ້າປະກວດໂດຍ ທ. ສະເຫຼີມສັກ ກຸນອາວົງ (Th. Saleumsak Kunavong), ທີ່ທຳທ່າລັກເອົາກະແຈລົດຂອງໝູ່ໄປ ແລະ ດັກໄວ້ຢູ່ຫຼັງປະຕູ ເພື່ອໃຫ້ໝູ່ບໍ່ສາມາດຂັບລົດເມືອຕອນເມົາໄດ້. ແນວຄວາມຄິດຮູບພາບອື່ນໆທີ່ຊະນະ ໃນການຫ້າມໝູ່ຈາກການດື່ມແລ້ວຂັບປະກອບດ້ວຍ: ການລ໋ອກທາງອອກດ້ວຍກະແຈໂລຫະ, ການພາໝູ່ຍ່າງກັບບ້ານ ແລະ ຊຸກລໍ້ພາເພື່ອນກັບບ້ານດ້ວຍລໍ້ຊື້ເຄື່ອງ. ຂໍສະແດງຄວາມຍິນດີກັບບັນດາຜູ້ຊະນະທັງໝົດ!
ການປ່ຽນພຶດຕິກໍາ, ຊ່ວຍຮັກສາຊີວິດໄວ້ໄດ້.
ການປະກວດຮູບພາບໄດ້ປະສົບຜົນສຳເລັດ ໃນການກະຕຸ້ນໃຫ້ ບັນດາຊາວໜຸ່ມໄດ້ຮຽນຮູ້ເພີ່ມຕື່ມກ່ຽວກັບວິທີການອອກລິດເຮັດວຽກຂອງທາດເຫຼົ້າໃນຮ່າງກາຍ, ພັນທະທາງດ້ານກົດໝາຍ ແລະ ຄຳແນະນຳທີ່ເປັນປະໂຫຍດເພື່ອຫຼີກເວັ້ນການດື່ມແລ້ວຂັບ. ຈາກການເຂົ້າຮ່ວມການປະກວດ, ຈະເຮັດໃຫ້ບັນດາຊາວໜຸ່ມໄດ້ຖືກບັງຄັບໃຫ້ໃຊ້ວິຈາລະນະຍານຕໍ່ ການກະທຳຂອງຕົນເອງ ແລະ ຄວາມສຳພັນກັບການດື່ມແລ້ວຂັບ, ໄດ້ຮັບຮູ້ໂດຍຈິດໃຕ້ສຳນຶກຕໍ່ ການຮັບຂໍ້ຄວາມຊ້ຳແລ້ວຊ້ຳອີກ ເປັນເວລາດົນນານ ແລະ ໄດ້ຮັບການຈູງໃຈໃຫ້ບອກຕໍ່ແກ່ໝູ່ເພື່ອນຂອງເຂົາເຈົ້າ. ການມີສ່ວນຮ່ວມ ແລະ ການເຂົ້າຮ່ວມໃນລະດັບສູງຂອງແຄມເປນໄດ້ເສີມສ້າງໃຫ້ບັນດາຊາວໜຸ່ມເປີດໃຈຕໍ່ການຮຽນຮູ້ກ່ຽວກັບການດື່ມຢ່າງມີຄວາມຮັບຜິດຊອບ ແລະ ການປ່ຽນແປງພຶດຕິກໍາຂອງເຂົາເຈົ້າໃນການດື່ມແລ້ວຂັບ.
ແຄມເປນ “ພະລັງຂອງຄຳວ່າ ບໍ່” ເປັນຕົວແທນໃຫ້ແກ່ພັນທະມິດທີ່ເປັນເອກະລັກຂອງບັນດາຄູ່ຮ່ວມມືຈຳນວນ 28 ແຫ່ງທີ່ເປັນຕົວແທນມາຈາກບັນດາອົງການຈັດຕັ້ງຫຼາຍຝ່າຍ, ອົງກອນບໍ່ຫວັງຜົນກໍາໄລໃນຊຸມຊົນ, ພາກເອກະຊົນ, ພາກລັດ ແລະ ອົງການຈັດຕັ້ງສັງຄົມ. ການຮ່ວມມືຄັ້ງນີ້ອາດຈະເປັນແບບຢ່າງສໍາລັບໂຄງການການບໍລິການຂອງພາກລັດ ໃນອະນາຄົດດ້ວຍການສ້າງອິດທິພົນໃນລະດັບພາກພື້ນ ພ້ອມທັງຮັບປະກັນໄດ້ວ່າແຄມເປນແມ່ນມີຄວາມເໝາະສົມກັບຊຸມຊົນ ແລະ ສະພາບການໃນທ້ອງຖິ່ນ.
ທ່ານ Na Huong Hoang, CEO ຂອງສະມຄົມລົດຍົນແຫ່ງ ສສ ຫວຽດນາມ ໄດ້ກ່າວວ່າ: “ການອ່ານກ່ຽວກັບຄວາມສ່ຽງຈາກການດື່ມແລ້ວຂັບ ແລະ ການປະຕິບັດຕົວຈິງແມ່ນຄົນລະເລື່ອງເລີຍ – ເພື່ອກ້າວຂຶ້ນ ແລະ ເຂົ້າຮ່ວມຂະບວນການການເຄື່ອນໄຫວຮຽກຮ້ອງຄວາມເອົາໃຈໃສ່ເຖິງໄພອັນຕະລາຍຂອງການດື່ມທີ່ຂາດຄວາມຮັບຜິດຊອບ”. “ພວກເຮົາພູມໃຈໃນບັນດາຊາວໜຸ່ມໃນທົ່ວຊຸມຊົນຂອງພວກເຮົາໃນອາຊີຕາເວັນອອກສຽງໃຕ້ສໍາລັບການອອກສຽງຂອງຕົນກ່ຽວກັບບັນຫາທີ່ສໍາຄັນນີ້.” ທ່ານ John O'Keeffe, Asia Pacific & Global Travel ສຳລັບ Diageo ແລະ ປະທານ APISWA ໃນປັດຈຸບັນນີ້ ໄດ້ກ່າວວ່າ: “ພວກເຮົາມີຄວາມຕື່ນເຕັ້ນຫຼາຍທີ່ຈະສືບຕໍ່ຮ່ວມມືກັບສະມາຄົມລົດຍົນແຫ່ງ ສສ ຫວຽດນາມ ແລະ ບັນດາຄູ່ຮ່ວມມືທັງໝົດຂອງພວກເຮົາເພື່ອສົ່ງຂໍ້ຄວາມກ່ຽວກັບການດື່ມຢ່າງມີຄວາມຮັບຜິດຊອບໃຫ້ແກ່ບັນດາຊາວໜຸ່ມທີ່ມີອາຍຸ ໃນເກນການດື່ມທີ່ຖືກກົດໝາຍຢູ່ອາຊີຕາເວັນອອກ ສຽງໃຕ້”. “ການປ່ຽນພຶດຕິກຳ ແລະ ການໃຫ້ກຸ່ມຊາວໜຸ່ມເລືອກຢ່າງມີ ຂໍ້ມູນແມ່ນມີຄວາມສຳຄັນໃນການຊ່ວຍຫຼຸດຜ່ອນອຸບັດຕິເຫດຕາມທ້ອງຖະໜົນທີ່ກ່ຽວຂ້ອງກັບເຫຼົ້າໃຫ້ໜ້ອຍລົງ”.
0 comments:
Post a Comment